Vertenza Alcoa: traballantis blocant sa centrali de s'Enel, Prc e Pdci proponint a is síndigus de lassai sa carriga

(IlMinuto) - Casteddu, 23 de su mes''e totussantus - Est senz''e reposu sa lota de is operàjus de s'Alcoa de Portovesme po pediri de no serrai s'istabilimentu. A su notti, de is 24.30 a is 2 de su mangianu circa, is traballantis de sa multinazionali de s'allumìniu ant blocau is arrastellus de sa centrali de s'Enel po firmai s'intrada de su craboni chi est nezzessariu a sa produzioni de s'energia elettrica. Is traballantis - chi sighint a ocupai s'istabilimentu - funt sempiri prus tesus e est forsis po timoria de una cuntestadura ca su ministru de su "Sviluppo Economico", Claudio Scajola, est mancau a s'atóbiu po su "gasdotto Galsi", chi s'est tentu custu mangianu in su T Hotel de Casteddu. Un'assembrea noa po sa vertenza Alcoa - cun sa partecipazioni de sa Regioni, de su Guvernu, de s'azienda e de is sindacaus - s'at a tenni giòbia in Roma. In su mentris is segretarius regionalis de su Prc e de su Pdci, Gianni Fresu e Claudio Giorgi, ant proponiu sa rinunzia a su mandau de parti de is amministrazionis comunalis de su Sulcis. "Su ai bloccau sa produzioni in d'un'istabilimentu comenti cussu de s'Alcoa - iscrirint is esponentis de sa "Federazione della Sinistra di Alternativa" - no podit essi unu passaggiu temporaneu, perou est unu segnali forti de sa voluntadi de serrai e de diroccai is impiantus (...). In custu casu est nezzessariu unu gestu politicu forti chi portit totus is sindigus e is consillus comunalis a lassai sa carriga, e chi fazzat in modu de portai atenzioni a is responsabbilidadis politicas de chini no at scipiu oltrepassai is promissas e is isperanzias".