Tumori a sa piturra: in Casteddu una tecnica chirúrgica noa. Cenabara s'atóbiu po chistionai de prevenzioni in s'Hotel Mediterraneo

(IlMinuto) – Casteddu, 25 de su mes''e totussantus - "Sa prevenzioni est unu fueddu chi depit intrai in s'usu comunu de is sadrus diventendi una pràtica garantia de su Serbiziu sanitariu nazionali cun programmas ispecificus. Po custu eus promoviu un apuntamentu cun s'iscopu de contribbuiri a sa prevenzioni e a s'informazioni de sa realidadi sadra. Un'apuntamentu chi tenit unu significau prezisu in sa cida chi arregordat sa 'Giornata mondiale contro la violenza sulle donne'”. Dd'at nau Maria Grazia Caligaris, presidenti de s’associazioni "Socialismo Diritti Riforme", ispieghendi a is giornalistas s'atóbiu “Conoscere per Guarire. Il tumore al seno: percorsi ed esperienze”. S'apuntamentu, in programma po cenabara 27 de su mes''e totussantus, a is 16, in sa Sala Venere de s'Hotel Mediterraneo de Casteddu, at a donai s'opportunidadi de conòsciri is istudiosus impegnaus in sa diàgnosi e in sa cura de su tumori de su Presidiu oncologicu "Armando Businco" de s'Asl 8. "In Italia – at agiuntu Caligaris – sa prevenzioni est ancora una pràtica disconnota a su 50 po centu de sa popolazioni. Po su tumori a sa piturra, chi registrat una presénzia manna tra is féminas, funt in dognia modu nezessarias sa prevenzioni primaria, po podit individuai is fattoris de arriscus, e sa diàgnosi cabudraxa. Importanti est puru acconsentiri a is programmas de screening po su tumori de s'uteru, cumenzau s'annu passau, e po su cancru a sa piturra, chi at a cumenzai tra pagu tempus". "Su cancru de sa tita - at spiegau Massimo Dessena, segretariu nazionali de sa 'Società Italiana di Chirurgia Oncologica'– est sa neoplasia chi prus colpit is féminas e tenit un'incidenzia sempiri prus manna. Si contat ca po 10 féminas, una in sa vida sua at a lotai contra a su tumori a sa piturra". "Sa chirurgia - at arregordau Giuseppe Murenu responsabili de s’'Unità operativa' – partizipat a unu sperimentu de medas istudiosus chi permìttit de donai curas po is tumoris prus piticus in su momentu de s'operazioni, evitendi sa radioterapia. Unu metodu meda modernu chi permìttit a is féminas sadras de evitai viaggius in continenti. Un'opportunidai finzas a immoi provada cun 27 malàdias chi ant tentu esitu positivu. Cussu de Casteddu est s'ùnicu centru de s'Italia centru-meridionali a ai sperimentau, a pustis de Roma, custu metodu".