Travigu de is mercanzias: Caligaris (Sdr), Fs abbandonat sa Sardigna

(IlMinuto) - Casteddu, 13 de su mes''e totussantus - "Est finiu su travigu de is mercanzias fattu in is rotaias tra sa Sardigna e sa penisula e s'isola est bessida definitivamenti de is circùitus europeus. Sa soziedadi pubblica "Ferrovie dello Stato" at dezzisu a sola de abbandonai sa distanzia Sardigna-continenti a pustis de dexinas de annus de attividadis chi ant tentu medas finanziamentus de su Stadu e de sa Regioni. Una cosa de si bringungiai, un'attu de arroganzia, mentris su Guvernu nazionali sustenit in dognia occasioni de essi attentu a s'economia de su Meridioni e de is isolas". Ddu dinùnziat cun d'una nota s'Associazioni "socialismo diritti riforme". L'Asdr esprimit solidariedadi a is organizzazionis sindacalis chi ant proclamau su isciòpiru "finzas a candu s'azienda F.S. no at essi disponibili a pigai in cunsiderazioni possibbilidadis diversas de su diroccamentu". "Trenitalia at dezidiu - narat Maria Grazia Caligaris, presidenti de s'associazioni e promotrici, de consillera regionali socialista, de un'espostu chi denunziat a is Procuras de sa Repubblica e de sa Corte dei Conti - de no rinnovai is concessionis a Rfi po sa distanzia Figari-Civitavecchia e de serrai de su primu de su mes''e paschixèdda s'impiantu de s'iscalu de su Laziu. S'atteggiamentu de is "Ferrovie dello Stato" cun sa Sardigna est assurdu e dimostrat un'arroganzia chi sa Regioni e su Consillu regionali no podint azzettai e nemancu segundai".