Traballu: is precarius de su Comunu de Casteddu, "sua Podestà" no applicat is leis regionalis po sa stabilizzazioni

(IlMinuto) – Casteddu, 18 de su totussantus - "Lavoro stabile subito". Cun custus tres fueddus s'oberrit su volantinu distribuiu de is traballantis precarius de su comunu de Casteddu ariseru a merì, candu ant manifestau a facc''e sa sedi de su Comunu, aundi ddoi fiat riuniu su Consillu. Is 70 traballantis - in calincunu casu cun 25 annus de serbiziu "precariu ma continuu" po s'amministrazioni comunali - no tenint nesciuna intenzioni de mollai. Nonostanti s'isbarazzamentu de su presidiu de via Roma, fattu cun sa forza cida passada, is traballantis sighint a pediri a su sindigu, Emilio Floris, e a s'assessori de su "Personale", Giuseppe Farris, de applicai sa lei regionali n.3 de su 7 de su mes''e austu 2009. Seus is precarius e is disoccuppaus de is cantieris comunalis, chi in basi a sa normativa regionali noa tenint is requisitus po essi stabilizzaus". "Protestaus - nant - contra a cust'amministrazioni, poita no tenit nesciuna intenzioni de si stabilizzai. No si bolllint stabilizzai e no bollint oberriri is cantieris comunalis, cantieris chi donant de traballai a medas personas: poita "sua Podestà" dezzidit de no applicai is leis regionalis, unas centina de familias casteddaias ant a podi biviri scéti cun su sussidiu de is serbizius sozialis".