"No seus una chistioni de órdini pubblicu". 70 traballantis pedint a su Comunu de Casteddu de aplicai is normas regionalis de su "collegato" po sa stabilizzazioni de is precarius

(IlMinuto) – Casteddu, 3 de su mes''e totussantus - Mandai a sa Regioni, intru su términ''e lei de su 6 de su mes''e totussantus, su pianu de stabilizzazioni po fai cantu primu is cantieris comunalis. Funt custas is dimandas chi is 70 traballantis precarius de su Comunu de Casteddu - chi de una cida protestant accampaus a facc''e de Palazzu civico de via Roma - faint a s'amministrazioni comunali. Is arrexonis de sa lota funti stetias spiegadas custu mangianu in d'una conferènzia stampa. Su "collegato" a sa Finanziaria aprovau in su mes''e austu de su Consillu regionali - ant spiegau is traballantis - iat permittiri su traballu stabili de totus is precarius cun prus de 30 mesis de traballu in su Comunu, ma s'amministrazioni comunali - diversamenti de sa Provìnzia de Casteddu - po immoi no riconnoscit a is traballantis su dirittu a tenni unu traballu. "S'imputant - at declarau ariseru a s'"Unione Sarda" s'assessori a su "Personale" de su Comunu Giuseppe Farris - de no ai ancora fattu su bandu comenti in veci at fattu sa Provìnzia chi at emanau unu bandu in basi a una normativa chi po su Minustru Fitto est incostituzionali". In su fratempus - ant dinunziau is traballantis tra is banderas de sa funzioni pubblica de sa Cgil - is cantieris comunalis funt firmus e sa lota de is precarius depit essi esaminada in s'atóbiu de su Consillu comunali de custumerì comenti una simplizi chistioni de ordini pubblicu. Ma is precarius - edadi media 57 annus - ant arremacciau, cun disgustu po is fueddus naus de s'assessori, de fai totu custu scéti po rivendicai su dirittu a su traballu decretau própriu de sa Costituzioni citada de Farris.