Economia e ambienti: in Firenzi si chistionat de su futuru de sa Sardigna. Atóbiu aprontau de sa "Libera Univesidade Sarda"

(IlMinuto) - Casteddu, 19 de su mes''e totussantus - "From Sardinia to the World: economia e benessere". Est custu su tema de su dibattidu in programma cras in Firenzi (17.45) in sa libreria-café La citè. Po s'apuntamentu aprontau de Silvio Orrù, su responsabili de sa Libera Universidade Sarda in sa cittadi de sa Toscana, ant a participai puru Bobore Bussa (azienda Massajos) cun d'unu interventu chi at a afrontai su tema "Dalla mancata industrializzazione all'agricoltura sostenibile",
una chistioni meda attuali in sa Sardigna industriali, chi de tramuntana a meridioni est attravessada de sa crisi de su capitalismu internazionali. A sa fini de s'atóbiu, chi at a biri is interventus de Giovanni Acquati ("Una finanza al servizio del benessere") e de Sergio Paderi ("Dalla decrescita alle transition town: un percorso per liberarci dal petrolio e uscire dalla crisi"), at essi proiettau "Oil. La forza devastante del petrolio. La dignità del popolo sardo": su film-dinùnzia de Massimiliano Mazzotta chi chistionat de sa Saras de Sarròccu, premiau de pagu tempus in su Festival Cinemambiente de Torinu comenti su mellus documentariu.