Diri nazionali de sa prevenzioni de su diabbeti: arriscu meda mannu po su 50 po centu de is personas esaminadas

(IlMinuto) – Casteddu, 17 de su mes''e totussantus - Funti stetias casi 500 is personas chi funt andadas su fin''e cida passau in is istrutturas de sa Asl de Casteddu e ant addiriu a sa "Giornata nazionale del Diabete". Su Serbiziu de diabbetologia de s'ispidali SS. Trinità, su centru diabbetologicu de s'ispidali San Giuseppe de Isili e su "Distretto Quartu Parteolla" ant obertu su percursu de sa prevenzioni po totu cussus chi si funt boffius fai su test po valutai s'arriscu. "Ocannu sa genti at acconsentiu prus de is annus passaus - at nau su diabbetolugu de s'ispidali SS. Trinità Luciano Carboni -: prus de 220 personas, de edadi tra is 40 e is 65 annus funt benius in su puntu informativu de via Quirra e in s'ispidali SS. Trinità po fai is controllus". Is nùmerus funt drammàticus: prus de su 50 po centu de custa genti est a arriscu de diabbeti, custas personas, a pustis de is risultaus, funti stetias mandadas a fai anàlisi prus precisas. In 200 in veci si funt agataus in su porticu de su centru soziali de Isili po si controllai sa glicemia, mentris 70 personas funt stetias visitadas in Cuartu.