Auditorium de prazixessa Dettori: associazionis contra a s'afidamentu de sa gestioni a una compagnia scéti

(IlMinuto) – Casteddu, 11 de su mes''e totussantus - Cun cali prozedimentu s'Auditorium comunali de prazixedda Dettori, esti stetiu afidau a s'iscola de recitazioni de Lelio Lecis? Comenti at fattu una gestioni chi furiat de s'Assessorau a sa "Cultura" a passai a s'Assessorau de is "Politiche sociali"? Est cantu pedint cun d'una lítera oberta rivolgia a su sindigu Emilio Floris e a is assessoris cumpetentis is rappresentantis de numerosas associazionis culturalis attivas in Casteddu e in su circondariu. Primu firmataria - de su documentu chi pedit un'atóbiu cun sa Giunta comunali - est Aurora Simeone de su Teatru "del Sale". "Est nostru cunvincimentu - si podit liggiri in sa lítera - chi s'afidamentu de s'Auditorium comunali a un'unica produzioni artistica, at impediri a is aterus operadoris culturalis de sa cittadi de pigai parti attiva a sa vida de su teatru. Chistionaus de artistas chi in is annus passau ant scipiu valorizzai s'iscena cun propostas de altu livellu artisticu, cun frequenzia agiudadas de s'Assessorau comunali de sa "Cultura". Po is firmatarius no est claru su modu chi at portau s'Auditorium comunali at essi gestiu scéti de s'iscola de Lecis. "S'Auditorium comunali - precisant - esti stetiu finzas a immoi s'unicu teatru pubblicu de Casteddu a no essi afidau scéti a una compagnia, ma furiat un'ispaziu a disposizioni de medas associazionis, no scéti casteddaias (...). Ddoi funt diversas realtadis associativas chi funt diponibilis a collaborai impari e a presentai progettus po una gestioni artistica, tecnica e amministrativa coordinada de su teatru, po fai in modu ca custu no perdat s'iscopu originàriu".