Altragricoltura: sa Sardigna declarit su stadu de crisi comenti at fattu sa Sicilia. "Prontus a occupai s'assessorau"

(IlMinuto) – Casteddu, 2 de su mes''e totussantus - Fai totu is passus nezzessarius po declarai su stadu de crisi de sa massaria aici comenti funt faendi is istituzionis de sa Sicilia e de sa Basilicata. Est custa sa dimanda chi su coordinadori nazionali de "Altragricoltura", Gianni Fabbris, at fattu oi a su presidenti de sa Giunta regionali de sa Sardigna, Ugo Cappellacci, in d'una confèrenzia stampa in Casteddu. "S'assessori Prato - at nau Piergiorgio Silanus - at circau de sciamiai "Altragricoltura" dimostrendi de no sciri fai politica e de no conòsciri sa lei 44 de su 1988". "De parti de is massajus - at ispiegau Fabbris - crescit sa nezzessidadi de andai a occupai s'Assessorau de s'"Agricoltura". Is massajus ant a dezidi ita fai cras in d'un'atóbiu, in su mentris eus a attèndi ca su presidenti Cappellacci cunvochit un'atóbiu. Su nostru est unu movimentu sériu". Sa declarazioni de su stadu de crisi po sa massaria - esti stetiu nau - iat a podi consentiri de finanziai sa massaria in crisi. Is critérius de s'Unione - at ispiegau su leader de Altragricoltura - iant a podi fai serrai su 40 po centu de is aziendas de sa massaria in Sardigna in pagus tempus. "S'assesori Prato - at arremacciau Fabbris - no podit nai ca is massajus sadrus no tenint ateru de fai chi s'arremangai e fai mercau: prodúsiri in Sardigna costat su 20 po centu in prus". Abarrat de risolviri su nuu de sa lei 44 de su 1988, chi bidit prus de 300 aziendas chi  arriscant d'essi bendias a s'asta. In custu sensu "Altragricoltura" at pediu una dilatazioni de s'attividadi de sa Commissioni chi po lei iat a depi presentai - ma no dd'at fattu - a su presidenti de su Consillu una proposta po sa "ristrutturazioni" de is dèpidus fattus po mori de sa lei 44/88. Un'allonghiamentu de is traballus de sa Commissioni - scadius su 31 de su mes''e argiolas de su 2009 - iat a podi prorogai sa suspensioni de is "giudizius in pendenzia" e de is modus de "coberànza e recúperu" tímius de is famiglias de centinas de massajus de s'Isola.