Alcoa: s'istabilimentu de Portovesmi no at a serrai. Ddu narat Cappellacci

(IlMinuto) - Casteddu, 19 de su mes''e totussantus - S'istabilimentu Alcoa de Portovesmi no at a serrai. Dd'at nau ariseru in Roma su presidenti de sa Regioni, Ugo Cappellacci, a sa fin''e s'atóbiu cun su ministru de su "Sviluppo economico", Claudio Scajola, e ddu scririt in d'una nota su situ istituzionali de sa Regioni Sardigna. Sa Commissioni- www.regione.sardegna.it usat su cundizionali - "at a podi decidi de abasciai sa sanzioni fatta a s'azienda po is agiudus chi cuss''e totu at donau in sa furnidura de energia elettrica, faendiddi pagai su préziu prus basciu tra cussus previdius de sa normativa comunitaria". De s'amministradori delegau de s'Alcoa - si podit ligiri in s'artículu on line - funt arribbadas finànzas po torrai a ponni in motu s'attividadi de sa multinazionali de s'allumíniu in Sardigna. Ma, a is fueddus, in custu momentu, no sighint is fattus, difatis no ddu est nesciunu acórdiu scrittu. Is traballantis de s'Alcoa, chi in su mangianu de ariseru iant manifestau in Roma - pighendi puru calicunu corpu de manganellu de parti de sa Pulizia - ant aghilliu s'ésitu de s'atóbiu cun cumprensìbili satisfazioni.