Razzismu? No grazias! Sàbudu 17 de su mes''e ledaminis sa Sardigna calat in prazza contra a dognia intolleranzia

(IlMinuto) – Casteddu, 15 de su mes''e ledaminis - Sa Sardigna narat no a su razzismu. Sàbudu a mangianu in Casteddu immigraus, istudiantis, partidus de sa sinistra antagonista, sindacaus, associazionis e gruppus impignaus in su soziali, s'ant a agatai a is 10.30 in prazza Garibaldi, in Casteddu, po manifestai contra a totus is formas de intolleranzia. Is fueddus chi animant su "Comitato 17 ottobre" funt simplizis e claurus: rivocazioni de su "pacchetto sicurezza", fini de is respingimentus, serradura definitiva de is centrus de indentificazioni e de scacciada, segadura de s'acapiamentu de su permissu de residenzia cun su cuntrattu de traballu. S'iniziativa esti stetia presentada custu mangianu in d'una conferènzia stampa in sa "Casa dello Studente" in via Trentino, in Casteddu. "S'Italia -at ispiegau Antonello Tiddia de sa "Rete 28 aprile" Cgil - s'est trasformada in d'una terra razzista e omofoba, diversa de cussa chi conosciàus. Eus dezidiu de fai custa manifestazioni po fai movi is cussiènzias e po cambiai custas situazionis". "Pedeus - at precisau Marco Ghinolfi de su "Comitato 17 ottobre" - sa fini de is Cie, berus e propius presonis, partedi de cussu de Su Masu". S'intolleranzia e su razzismu - ant ispiegau is promotoris - funt maladias boffias de sa politica nazionali. "Su Guvernu - at nau Enrico Rubiu (Rdb Cub) - incitat sa timoria de su strangiu po sviai s'attenzioni de is efetus de crisi economica". Su corteu s'at a serrai in prazza Matteotti, su logu cittadinu aundi si riunint is immigraus. De innì, a pagus metrus de su Municipiu, is manifestantis ant a sfogai sa propriu inchietudini cun s'amministrazioni de Casteddu chi, at nau Ghinolfi, "at dimostrau pagu attenzioni a is politicas de integrazioni, no ddoi est scéti custu, mala esti stetia puru s'ausenzia de assistenzia chi depit essi unu diritu po dognia cristianu".