2milla no contra a sa discriminazioni: risultau bonu in Casteddu po sa manifestazioni contra a su razzismu de su 17 de su mes''e ledaminis

(IlMinuto) - Casteddu, 19 de su mes''e ledaminis - "No al razzismo, i diritti non hanno confine": custa sa frasi in su striscioni de abertura de su corteu chi sàbudu a mangianu - contemporaneamenti cun sa mobilitazioni de Roma - s'est tentu in su centru de Casteddu. Prus de 2milla personans ant zerriau no a su razzismu e a sa discriminazioni. Medas istudiantis de s'iscola superiori, prus de 40 organizzazionis - associazionis, partidus politicus de sa sinistra antagonista, sindacaus e comitaus - e medas immigraus, màssimu de su Senegal, ant sfilau impari po pediri sa serradura de is Cie (cumenzendi de cussu de Su Masu), s'abrogazioni de su "pacchetto sicurezza" e sa fini de sa politica de is respingimentus. Su corteu, partiu a is 11 de prazza Garibaldi, est finiu in prazza Matteotti cun is interventus de is partecipantis. "Biveus in d'un'Italia 'omofoba e razzista' - at nau cun su megafonu su 'minatore rosso' Antonello Tiddia - chi no tenit rispettu po is immigraus, e nos seus innoi po tentai de moviri sa cussienzia de totus. Su guvernu de centrudestra at introdusiu sa culpa de immigrazioni clandestina. Una cosa meda gravi, chi colpit is dirittus de is immigraus e ddu su costringit a essi prus sfrutaus e debbilis in su logu de traballu". "Nos seus innoi po traballai, no seus innoi po furai!", at zerriau e ripitiu medas bortas in su megafonu unu rappresentanti de su gruppu senegalesu. "Bolleus libertadi po totus, poita in su mundu seus totus ugualis!"