Surcis Igresienti, is sindacaus torrant a chistionai de mobilitazioni

(IlMinuto) – Casteddu, 17 de su mes''e cabudanni - "Is traballantis óminis e féminas de is impresas de su Surcis Igresienti pedint chi siat postu fini a su recursu a is ammortizzatoris sozialis e pedint chi si torrit a cumenzai cun is produzionis e su traballu". Est custu su risurtau de s'atóbiu de ariseru tra is segreterius provinzialis de su Surcis Igresienti de Filcem Cgil, Femca Cisl, Uilcem Uil e is delegaus de is rappresentazas sindacalis de Rockwool, Eurallumina, Portovesme srl, Carbosulcis e Igea: totus aziendas chi "bivint su sciasciu de sa crisi chi at fattu firmai sa produzioni regalendi pagu seguresa a chini in is annus passaus at lotau po is prpórius progetus". Is sindacaus, si podit ligiri in d'una nota, "torrant a chistionai de mobilitazioni e lamant totus is traballantis a s'uniri a is iniziativas in su territoriu chi ant de essi decidias passu passu".