Su Consillu regionali narat no a is noas presonis ispecialis in s'Isola. Pediu su respetu de sa territorialidadi de sa pena. Su casu Bellomonte arribbat in Àula

(IlMinuto) – Casteddu, 28 de su mes''e cabudanni - S'assembrea legislativa de sa Sardigna narat no - po su perígulu de fai intrai genti de sa mafia - a sa costruzioni in s'Isola de is presonis ispecialis nous po aghilliri is presoneris suttapostus a s'artículu 41 bis de su Codici penali. In is diris passadas su Consillu regionali at aprovau una mozioni de su centrusinistra - primu firmataria Claudia Zuncheddu - chi impegnat sa Giunta regionali a si opòniri a sa proposta guvernativa (L'Unione Sarda 18 de su mes''e maju 2009) de costruiri, in Casteddu e in Tàtari, padillonis nous po is presoneris chi s'agatant in d'unu regimi de presoni aspru. "Ancora una borta sa Sardigna - scririt su consilleri Carlo Sechi de Sinistra e Libertà - benit usada de su stadu po risolviri is próprius chistionis a damnu de su pópulu sadru. Si depit iscongiurai custa ipòtesi, chi iat a podit espòniri su territoriu sadru a s'arribbu genti pagu bella, a s'arribbu de genti mafiosa e meda perigulosa". Sa mozioni aprovada impignat sa Giunta a pediri puru su respetu de s'intesa tra su Stadu e sa Regioni po sa "territorialidadi" de sa pena. "A custu propositu - spiegat Sechi - apu citau s'esémpiu de su cittadinu sadru Bruno Bellomonte, militanti de A manca pro d'Indipendentzia, arrestau e fattu presoneri in Roma su 10 de su mes''e làmpadas 2009 e in aspetu de giudiziu". "Su 25 de su mes''e argiolas - precisat Sechi - a pustis de 45 diris de isolamentu, Bellomonte esti stetiu portau in su presoni de Catanzaru. Su trasferimentu no at pigau in cunsiderazioni sa lei 354 de su 1975 chi previdit de fai andai is presoneris in is istitutus acanta a sa residénzia de is famílias. Po visitai Bruno in Catanzaru - serrat s'esponenti de Sel - is familiaris depint fai unu viàgiu de duas diris e depint spèndiri circa 400 eurus. Custa cosa fait sì ca po sa família siat impossibbili andai a agatai a Brunu cuattru bortas a su mesi comenti iat a depi essi".