Presoni de Aristanis: litera de is presoneris, "Biveus tra topis e sprecas in prus de 40 gradus"

(IlMinuto) - Casteddu, 9 de su mes''e cabudanni - Topis e sprecas chi passillant liberus. Cellas de quattru aundi ddoi funt setti cristianus. "Apposentus" blindaus a de diri e a de notti e cun d'unu clima de 40 gradus. Funt scéti calencunu scéti de is aspettus chi descrint is condizionis de is 144 presoneris de su presoni de Aristanis. Condizionis de vida chi is inserraus dinunziant in d'una litera portada a s'attenzioni de s'associazioni "Gato Obrero".
"Calincunu de nosu - commentat in d'una nota Gato Obrero - conoscit sa realidadi de su presoni de Aristanis poita at tentu sa possibilidadi de podi participai a is bisitas ispettivas e po cantu est a nostra conoscènzia sa situazioni fotografada in sa litera est  totalmenti realista". Is presoneris de Aristanis ispiegant in sa litera s'impossibilidadi de "fueddai cun sa direzioni, poita totus is tipus de protesta pacificas si funt riveladas inùtilis. Totus is petizionis chi dinunziat is numerosas chistionis funti stetias fuliadas de malu modu. Chini s'est fattu portavoce e promotori esti stetiu amelazzau".
Cussu chi is presoneris de Aristanis pedint est un'agiudu po portai a conoscènzia de sa genti e no scéti, una dinunzia a totu campu, chi chistionit de is condizionis de is cellas e de is bagnus ("s'arriscat de morri po mori de su fragu pudesciu") e po mori de sa cos''e pappai ("totu sa frutta e sa birdura chi donant a pappai est de fuliai").