"No seus nùmerus ma genti". Iscoppiat s'inchietudini de is precarius de s'iscola. Sit in a facc'e s'Ups de Su Masu

(IlMinuto) - Casteddu, 2 de su mes''e cabudanni - 800 maistus de iscola e 300 dipendentis Ata senz''e traballu. Scéti 121 postus de ruolu contra a 712 pensionis. Unu migliaju de precarius a fora de su mundu de s'iscola. Funt custus is nùmerus - riferius scéti a sa provìnzia de Casteddu - chi ant spìngiu sa Flc Cgil e is membrus de su gruppu Facebook "Docenti Precari Cagliari" a aprontai po custu mangianu unu sit in a facc'e s'Ufíciu "provinciale della scuola" de Su Masu. A sa manifestazioni ant adiriu puru is Cobas, e ddoi fiant puru is politicus de su Pd e de Rifondazione. "S'isfasciu de s'iscola in sa provìnzia de Casteddu - si podit liggiri in su volantinu distribuiu de sa Cgil - est su risurtau de is tàglius de su Guvernu, de cussu chi at fattu s'Ufíciu "scolastico" regionali e de sa mandronia de s'Assessorau regionali de sa "Pubblica istruzione". "No seus nùmerus, ma genti", est iscrittu in d'unu de is medas slogan espostus de is circa 100 partezipantis. Is manifestantis pedint immediatamenti su dinai nezzessariu po garantiri is postus de traballu a is maistus e a is dipendentis Ata e po assigurai una preparazioni dignitosa a is allievus. In custu momentu est in cursu un'atóbiu tra is rappresentantis de su sindacau e is dirigentis de s'Ups.