Instruzioni: sa lota de is traballantis precarius bloccat sa 131 in Casteddu e in su tataresu. No siccu a su decretu Gelmini

(IlMinuto) – Casteddu, 11 de su mes''e cabudanni - Attraversat sa Sardigna de cab'e susu a mesudì sa protesta de is precarius de s'instruzioni in Sardigna. Custu mangianu is precarius de s'iscola de su "Coordinamento precari", no scéti maistus, ma puru ausiliarius, impiegaus amministrativus e ténnicus - ant bloccau sa 131 acanta de Mùros, in su tataresu, e in Casteddu, in viale Monastir. Sa protesta sighit: su Cordinamentu de is precarius no at azzettau su decretu Gelmini approvau in is diris passadas ("bollit ponni is traballantis s'unu contra s'ateru"). Traballantis chi in medas casus funt precarius de dex'annus. In sa sedi de s'Usp de Su Masu, aundi sighit s'ocupazioni, ddoi funt appiccaus in d'unu pilastru is nominis e is "istorias" de calincunu precariu in lota. Tra totus risaltat cussu de Linuccio "precariu de su 1984, e oi senz''e traballu, ma in ocupazioni". Ariseru a merì s'ocupazioni esti stetia animada de unu momentu de "relax" impegnau. Elio Turno Arthemalle at presentau calincuna "rezzetta" pigada de "Scrittori à la carte" de Paolo Maccioni, liburu chi fait una burla de su stili de calincunu scrittori sadru. Arthemalle at interpretau Salvatore Niffoi, Francesco Abate e Flavio Soriga. Soriga e totu, acumpangiau da Giovanni Peresson a sa ghitarra, at ligiu calincuna pàgina de su bellissimu liburu Bellas Mariposas de Sergio Atzeni.