Viàgiu in is call center, aundi "is dirittus diventant concessionis"

(IlMinuto) - Casteddu, 31 de su mes''e austu - "Dirittus appicaus a unu filu": custu est su títulu de su dibattidu - cordinau de su responsàbbili de su traballu de su Prc Casteddu Roberto Loddo - chi s'est tentu cenàbara in Cuartu Sant'Alèni po sa "Festa di Liberazione". Cussu de is call center, at nau su sindacalista de sa Slc Cgil Giuseppe Nonnis, "est unu fenómenu chi esti stetiu tratau in is ùltimus annus cun calincunu liburu e calincunu film, perou lassendi stai custu, sa cosa no est andada prus innantis de aici. In aterus stadus, chini traballat in custu campu ddu fait in ateras condizionis. In Italia, e in modu particulari in Sardigna, esti stetiu fattu unu meccanismu de contrazioni de is dirittus chi no tenit esempius ugualis in aterus stadus. Un'arrexonamentu condivìdiu de su responsàbbili nazionali de su "dipartimento inchiesta" de su Prc, Vittorio Mantelli. "Is dipendentis de is call center - at nau - bivint in d'una condizioni "neo-servile", aundi sa solidariedadi tra traballantis est meda difícili. Su sindacau, perou, iat a podi fai calincosa de prus. In s'isola funt circa 8milla is operatoris de is call center: acanta a realidadis prus mannas comenti Sky ddoi funt realidadis pur piticas cun contornus pagus clarus. "Ddu est unu mundu de call center meda piticus - at nau su cordinadori de s'area call center de sa Slc Cgil Antonio Pola - aundi s'imperativu est bendiri e  is dirittus diventant concessionis. Logus de traballu aundi, si no bendis, ses biu comenti unu rigettau chi portat disgrazias, e ses lassau in d'un'arranconi".