Sanidadi: Espa (Pd), "Su decretu de s'assessori Liori po sa cumparzidúra de is cuatru millionis de eurus po is famílias diversamenti àbbilis est de fai un'atera borta"

(IlMinuto) - Casteddu, 26 de su mes''e austu - Su decretu de s'Assessorau de sa Sanidadi de su 30 de su mes''e argiolas chi istabilit is critèrius po sa cumparzidúra de cuatru millionis de eurus tra is  famílias chi si curant de personas diversamenti àbbilis est nullu. Ddu narat, cun d'una nota pubblica in su blog de cuss''e totu, su consilleri regionali de su Partito Democratico Marco Espa. A fai sì chi su decretu siat nullu, narat Espa, est s'aprovazioni de un'emendamentu a su "collegato" a sa Finanziaria de su 2009. "Su chi narat s'Assessorau - sighit su consilleri de su Pd - no depit essi pigau in cunsidériu. S'assessori Liori at a depi fai unu decretu nou de mandai a sa 'Commisisione Sanità e Politiche sociali' de su Consillu regionali". In custa sedi s'at a decídiri cumenti donai s'assignu o is curas. Espa cuntrastat cun decisioni is "cumparzidúras de dinai" chi no funt acumpangiadas de serbízius dipendenti" po is personas diversamenti àbbilis e is  famílias insoru. "Su dinai - narat Espa - fait praxeri a totus perou in Sardigna eus pigau in adotadura unu modellu diversu, prus sériu e de calidadi (...). No bolleus chi calincunu si pighit is contribbutus regionalis e a pustis, po necessidadi e po voluntadi, si comporit sa tv a su plasma noa o unu pezzu de sa macchina, mentris sa calidadi de sa vida de sa persona diversamenti àbbili e de sa família
sua abarrat uguali".