Proibizioni de donai a pappai a is canis bagamundus, sa "Lega per l'Abolizione Caccia" s'appellat a Giorgio Napolitano

(IlMinuto) - Casteddu, 28 de su mes''e austu - Arribat a su Quirinale sa vizenda de sa proibizioni de donai a pappai a is canis bagamundus boffia de su sindigu de Silìcua. In is cidas passadas sa "Lega per l'abolizione della Caccia" at fattu unu recursu estrordinariu a su presidenti de sa Repubblica, Giorgio Napolitano, contra a s'ordinanzia 38 de su 2009 firmada de su primu cittadinu de sa bidda. "Est fatta proibizioni - narat su documentu de su sindigu - de donai curas e cos''e pappai a is canis in sa via pubblica cun recipientis". S'ordinanzia no est litera morta e, in su mes'e làmpadas, una femmia iat pigau una multa de 105 eurus po ai donau a pappai a unu cani bagamundu. Sa chistioni est arribbada puru in su social network Facebook, cun sa creazioni de unu grupu "anti-ordinanza" chi, finzas a oi, at tentu is 36.873 adesionis.