Arti: Santu Sperau, finzas a su 12 de su mes''e argiolas sa mostra de Siqueiros

(IlMinuto) - Casteddu, 26 de su mes''e lampadas - At a sighiri finzas a su 12 de su mes''e argiolas, in su "Museo del Crudo" de Santu Sperau, sa mostra dedicada a un'importanti muralista de su Messico, David Alfaro Siqueiros: unu riconoscimentu a unu grandu maistu po s'anniversariu de is quarant'annus de sa nàscida de su muralismu in sa bidda. Connotu in primu persona de Sciola in su 1973 in Messico, su maistu muralista, candu iat biu is fotografias de is pipius pintendi is murus de su centru campidanesu, iat mostrau maraviglia e commovimentu. Tramiti unu percusu multimediali fattu de filmaus, registrazionis audio, cartèggius e fotografias, chini andat a biri sa mostra podit conòsciri is vàrius aspettus de sa personalidadi de s'artista.
S'esposizioni de Santu Sperau at'essi accumpangiada de diversus convegnus a tema, s'argomentu est: “Dal muralismo alle nuove forme d’arte moderna”, oi in Casteddu in sa Cittadella dei Musei e cras in Santu Sperau.
S'iniziativa, de importanzia internazionali, est patrocinada puru de s'Imbasciada de su Mexico in Italia.