Metanu. Fridays for Future Sardigna contra a s'assessore Cani

Sa chistione de su metanu est torrende in s’allega energètica. Si su mese de maju sos ministros de su G7 s’ant pigadu s’impinnu de reduire sas emissiones globales de custu gas intro de su 2030, est nova de pagas dies sa de s’assessore regionale de s’indùstria Emanuele Cani chi, intervistadu dae sa Nuova Sardegna, at naradu de lu chèrrere dare «a totu sos sardos». Fatu-fatu a custas decraratziones est lòmpida sa positzione contrària de Fridays for Future Sardigna: «Sa gestione de s’energia – narant – est unu disastru». Criticada sa «continuidade» cun sa Giunta Solinas. «Cando chi est pro votare unu disegnu de lege pro non pònnere impiantos Fer in su 99% de su territòriu sardu, s’assessore non tenet problemas a programmare rigassificadores, retes urbanas e gasdotos pro s’immagazinamentu e su trasportu de su prus potente gas climalterante chi s’agatet». Sos de FFF narant chi nono «a custa transitzione farsa» e chi «sos investimentos pùblicos pro sa metanizatzione sunt dinare furadu a sa colletividade». «Sa regione – serrant – s’impignet a serrare sas duas tzentrales a carbone de sa Sarlux e nche la finat cun sos pianos noos de metanizatzione».