Bestires cumpartzidos, solidariedade e moda tzirculare in Tàtari
Torrat in Tàtari sa regorta de sos bestires cumpartzidos. Sa faina est promòvidas dae s’assòtziu Sa Domo de Totus in collaboratzione cun su litzeu artìsticu “Figari” a pustis de àere firmadu una cunventzione pro sas oras de alternàntzia iscola-traballu (Ptco). Interessados sos pitzocos de su cursu de moda de su triènniu. «Su “Clothes sharing” (custu su nùmene in inglesu) de custa manera no est un’atu de solidariedade ebbia – narant sos organizadores – ma finas una letzione de economia tzirculare pro sos istudiantes. Sos pitzocos sunt parte de s’organizatzione e de sa gestione de totu sas fases de s’eventu; su chi b’abarrat de sos bestires regortos l’ant a torrare a impreare in su laboratòriu moda de su litzeu pro nde bogare a campu pìngios noos e pro dare vida noa didàtica a sos materiales». Claudio Vendram, titulare de sa càtedra de Design faeddat de su raportu intre iscola e territòriu ma finas de sa possibilidade «de fàghere isperimentare a sos pitzocos s’idea de sa tzircularidade de sa moda istesiende·nche·los dae s’idea consumìstica». «Custu progetu – annanghet Rosalba Meloni, responsàbile de su mutualismu de s’assòtziu – est una risposta cuncreta a s’economia de s’isprecu». Custas sas dies de regorta: su 21 de santandria (dae sas 10 a sa una e dae sas 16 a sas 20) e su 22 (dae sas 4 de merie a sas 8). Custas, imbetzes, sas de distributzione: su 23 e su 24 o a mangianu dae sas 10 a sa una o a borta de die dae sas 4 a sas 8. Custos sos cuntatos: 340 412 5486 e 338 215 4200 o sas pàginas Facebook e Instagram @domodetotus.