In Orane sas ripresas de su film pro Marianna Bussalai

Faina noa càrriga de istòria, de cultura e de impignu tzivile. Lunis s’11 de santandria comintzant in Orane sas ripresas de sa pellìcula “I fili della memoria” chi tzèlebrat sa vida de s’antifascista sarda Marianna Bussalai. Su film est giradu dae Gianluca Medas (chi l’at fintzas iscritu) e dae Maria Grazia Perria. Sa produtzione est afidada a s’assòtziu Figli d’Arte Medas e a Terra de Punt cun su contributu de sa Fondazione di Sardegna e su patrotzìniu de su Comune. Sa protagonista est s’atora durgalesa Marisa Serra (in sa foto) gia connòschida in “L’amore e la gloria”, pellìcula dedicada a sa giòvana Grazia Deledda. «Cun su contu de sa vida sua – narat Medas – torramus boghe a una fèmina chi at ischidu mirare addae de sos lìmites de su tempus suo. Est unu biàgiu in sas intragnas de sa cultura sarda e in sa fortza de chie at ischidu bisare un’ìsula prus cussente de s’identidade sua».