Binchet Trump. Ite naraiat Gramsci?
Antoni Gramsci naraiat chi «b’at crisi pròpiu cando est chi su betzu si nch’est morende e su nou non podet nàschere». Su sistema de cumpetitzione capitalista mundiale est mustrende totu sos marcos de una crisi chi tenet prus de una cara: polìtica, econòmica, diplomàtica, ambientale, culturale etc. The Grand old (betzu) party non b’est prus e su chi at bìnchidu est su partidu de Trump e non su republicanu; sas betzas retzetas de sos democràticos non perdent ebbia in s’Amèrica profunda de sos redneck ma belle in totue. Su nou chi diat dèvere nàschere e chi diat giuare a su mundu intreu est una furriada totale a manca, una furriada chi bòrtulet s’agenda imperialista. Ma in mancàntzia de alternativas àteros sunt sos chi binchent. Kamala Harris fiat pro su fracking e Trump est unu negatzionista de su clima; su presidente nou at a mudare iscenàrios in Ucraina (a su nessi gasi at naradu, mirende però a sa Tzina) e gasi etotu at a permìtere a Netanyahu de si nche pigare sa Palestina intrea. E nois abbaidende, cando carchi borta ponende·nos a seberare. Agiunghiat Gramsci in su matessi meledu suo chi «in custu interrennu una variedade manna de fenòmenos morbosos essit a campu». E no est su chi semus bidende?