Àreas idòneas, Maurizio Onnis: «In Casteddu b’at calicunu chi guvernat»

Maurizio Onnis, sìndigu de Biddanoa de Forru e unu de sas ghias de su movimentu contra a s'ispeculatzione energètica, gasi s'est espressadu analizende su disegnu de lege in contu de àreas idòneas. Custas sas paràulas suas:

«A concruos de chida m’apo lèghidu su disegnu de lege in contu de àreas idòneas cun sos allegados suos. E apo àpidu un’ispantu pantasiosu. Pro sa primu borta in ùndighi annos de Sardigna apo pensadu chi «in Casteddu b’at calicunu chi guvernat». Lu naro lassende·nche a banda sos contenutos de sa lege: medas cosas cherent sestadas, unas cantas nemmancu las cumpartzo e b’apo a torrare. Ma sa botza est articulada, iscrita dae chi màstigat sa matèria e, mescamente, movet dae una visione funduda in su perìodu mesanu e longu. Una missione tìpica de sa polìtica chi nd’aìamus pèrdidu s’abitùdine. Su cunfrontu, sas chidas imbenientes, est unu dovere e no l’amus a pòdere evitare. Su Palatzu non podet brincare sa Pratza, ma sa Pratza devet punnare a su cunfrontu ischende chi su Palatzu no est prus bòidu».