Sanidade, dae sa riorganizatzione a sa riforma noa de sa Giunta. Un’àtera. Sa Cgil: «Medidas ispetzìficas est su chi bi cheret»

Sos meses colados dae sos tretos de sa Giunta essiat petzi sa paràula «riorganizatzione». Como su faeddu est «riforma funtzionale» de su sistema sanitàriu. Bator sos pilastros. Su primu pertocat s’ispetzializatzione de sos ospidales; su segundu est in contu de preventzione, de salude mentale e de riabilitatzione; su de tres riguardat su sistema de emergèntzia-urgèntzia; su de bator si riferit a sa sanidade pediàtrica e oncològica. Carchi die a como sa Cgil aiat naradu chi non giuat una riforma noa: «Su chi serbit in custu momentu est a pònnere rimèdiu a sas emergèntzias cun medidas ispetzìficas comintzende dae sas listas de isetu e dae sos orgànicos».