Hymnos Off, sàbatu in Santu Lussùrgiu càntigos a chiterra

Torrat custu mese sa rassigna Hymnos Off. In programma pro sàbadu su 14 de cabudanni, a sas 8.30 de sero in sa domo de Donna Caterina de Santu Lussùrgiu (in carrera de Bonària 16), s’apuntamentu cun “Cantanne a S’Antiga”, est a nàrrere una serada de càntigos sardos a chiterra Franco Figos, Daniele Giallara e Marco Manca acumpangiados dae sa chiterra arpegiada de Pietro Nieddu. S’introdutzione – comente ghia pro s’iscurtu – l’ant a contivigiare Ignazio Macchiarella, professore de s’Università de Casteddu, e Salvatore Carboni, espertu de su càntigu logudoresu. Sa rassigna est organizada dae sa fundatzione Hymnos.