Prima die de Maju: Su traballu protagonista de su de chimbe CalaBeer (and Wine)

Prima die de maju abarrende in surcu, in La Caletta. A pustis de sos addòbios de sas editziones coladas in contu de ambiente e de territòriu, su momentu de allega e de meledu propostu dae s’assòtziu culturale Kawham in intro de sa de chimbe editziones de su Calabeer and Wine at a pertocare sas chistiones ligadas a su mundu de su traballu.

A sa dibata, in programma a sas 11 de mangianu in pratza de su portu e moderado dae su giornalista Mauro Piredda, b’ant a pigare parte Marianna Massaiu, formadora e dotzente, laureada in Iscièntzias psicològicas de su traballu, Antonio Satta, sotziòlogu e funtzionàriu regionale de s’Agenzia sarda pro sas polìticas ativas de su traballu, e Sebastiano Pira, consulente, formadore, dotzente in su campu de su food and beverage e sòtziu co-fundadore de Bhospitality.

S’at a faeddare duncas de disocupatzione e de cunsighèntzias sotziales de su fenòmenu, de traballu feminile, de sas oportunidades atuales pro traballadores e imprendidores noos e de sa formatzione comente istrumentu tzentrale pro sa crèschida e s’isvilupu de un’azienda e pro su benèssere de sos dipendentes.

A sa dibata, chi l’at a serrare Davide Fais de su diretivu de Kawham cun sos saludos suos, b’at a intervènnere fintzas s’assessore comunale de s’Isvilupu econòmicu Stefano Grecu rapresentende s’amministratzione locale, partner printzipale de s’evento.

No un festa de sa birra cale si siat, ma un’appuntamentu ue sos birrifìtzios artesanales minudos e sas cantinas s’aunint a àteras realidades artìsticas e assotziativas de su logu e a sos temas de importu.

«Che a onni annu – narant dae Kawham –, cun s’agiudu de sas impresas locales e de su Comune de Thiniscole, punnamus a promòvere unu modellu de isvilupu sustenìbile a livellu econòmicu, ambientale, e sotziale. A su tema de su traballu, chi bi deghet a beru sa prima die de maju, est dae meda chi bi fìamus punnende».

Su Calabeer and Wine at a comintzare a mangianu, dae sas 10, dae sa pratza de su Portu finas a sa rugrada intre sas carreras de Nazario Sauro e de Ancona, est a nàrrere sas prus de importu de sa localidade marina nòdida.

Ses sos stand chi amus a agatare manu-manu: Triulada, Arabus Beer, Centoteste, Zemyna, Santu Jorgi, Birrificio agricolo Reforte.

Custas postatziones s’ant a intreverare cun òrdine regulare in pare a sas de sas realidades vinìculas Sassu, Binza ‘e su Re, Cantina Giacu, Cantina Giovanni Ladu e Cantina Sorres. Cun issos fintzas unos cantos puntos espositivos: s’impreu a nou, s’ogetìstica e sos hobbistas de Associazione creativi del Nuorese; sos artesanos de Ceramiche Deiana; sas corbuleddas de Luca Funedda; sos granos antigos de I Grani di Atlantide; s’artesanadu e sos gurteddos de Sergio Corrias.

Intre sos puntos de interessu finamentas sos stand de Cosmo, partner mannu de s’eventu cun unu servìtziu de nolègiu cun tzaferru ativu a die intrea, e de sa Rete d’impresa La Caletta, cun informos e merchandising. Totu est coordinadu dae sos organizadores de sa manifestatzione chi ant a àere s’info point issoro frunende assistèntzia, ghia e promotzione de su territòriu.

Prenu fintzas su programma de s’intratenimentu musicale cun duos Dj set (Ozzy e Giove), bator esibitziones live (Made in Japan, Dirty Cheese, Mnemonia e Prisma) e una ràdiu web cun trasmissiones in direta, intervistas e mùsica de sos Dj.