Santa Luchia, sos pitzocos de s'Oggiano de Thiniscole pulende sa pineta

Chenàbura birde pro sos istudiantes de s’istitutu Oggiano de Thiniscole. Chimbata pitzocos intre sos de sa V-A (Amministratzione, finàntzia e marketing), de sa IV-A (Geòmetras), de sa III-B (Enogastronomia) e de sa II-A (Turìsticu) nche sunt lòmpidos a sa pineta de Santa Luchia pro innetare su logu prus chi non frecuentadu dae turistas e tzitadinos, non totu cantos dìligos in sa gestione de sos refudos produidos in cussu logu de atopu. A sos pitzocos los ant a cumpangiados sos dotzentes Rosa Sirigu (frantzesu), Gianluca Rossini (tedescu), Antonella Porcu (informàtica), Manuela Delussu e Piera Salvai (inglesu), Loredana Capozzoli e Donato Fermo (sustegnu). «Sa cosa naschet in iscola s’annu coladu – at naradu Sirigu – e pro custu amus fatu unas cantas letziones pro lis nàrrere ite est sa Riserva di Biosfera Mab chi a custu territòriu bi l’at dada s’Unesco». Sa die l’ant organizada in pare cun su Ceas de Santa Luchia.