Ischizofrenia, 245mìgia sos chi nde sufrint in Itàlia

Dillìrios sufridos e marcos retzidos. Semus faeddende de salude mentale, de sa soledade e de istesiadura. Cunforma a s’Organizatzione mundiale de sa sanidade belle 24 milliones sunt sos chi sufrint de psicosi ischizofrènica cun pertzentuales parìviles intre òmines e fèminas. In Itàlia semus a cuota 245mìgia.

Sos sìntomos non pertocant sos istorbos de sa pertzetzione ebbia ma finamentas sa mèngua de sa reatividade emotiva, s’anedonia, s’asotzialidade e àteros. A parusu sa maladia si manifestat intre sos 18 e sos 28 annos e, cunforma a sos datos EpiCentro Iss, sa cosa comintzat cun fases sintomatològicas ablandadas, cun sa persone chi si serrat in intro de se, semper prus pagu interessada a su chi b’at a inghìriu suo, lassende·nche a un’ala e sena motivos amigos e relatziones sentimentales, gasi etotu s’iscola e su traballu.

Custos datos nche sunt in intro de un'indàgine calitativa de sa Fondazione Onda e de sa Società italiana di neuropsicofarmacologia (Sinpf). Indàgine chi si serrat cun sa punna de unu tratamentu su prus pagu psichiatrizadu e cun sas Domos de comunidade comente sa mègius risposta pro sa leada in càrrigu de custas persones.

m.p.

immàgine de George Hodan