In Pasada su cuncursu de prosa in sardu "Màuru Deledda"

Bandidu su regulamentu de s’editzione 2023 de su su cuncursu de prosa in sardu "Màuru Deledda" organizadu dae sa famìlia e dae sos amigos de s'artista chi fundeit su Prèmiu Casteddu de sa Fae, dae sa Sotziedade pro sa limba sarda e dae s'editore Papiros.

.Custos sos puntos in evidèntzia: «Sas òperas, inèditas, in prosa, in forma de romanzu, devent èssere iscritas in limba sarda e non devent èssere istadas mai premiadas o sinnaladas in àteros cuncursos; at a èssere premiadu, cunforma a su pàrrere de sa giuria, su mègius romanzu; su prèmiu pro s’autore de s’òpera chi binchet est s’editzione de s’òpera premiada in unu libru publicadu a contu de su Comitadu organizadore "Cuncursu Màuru Deledda", dae sa sotziedade editoriale Papiros, chi est titulare de sos deretos literàrios pro tres annos dae sa data de publicatzione, 30 còpias de su libru imprentadu, su diploma de su cuncursu».

Pro cuncùrrere, s’òpera devet èssere iscrita in limba sarda comuna, devet èssere a su mancu de 70 pàginas e devet lòmpere via mail (sotziedadeprosalimbasarda@gmail.com) intro de su 15 de martzu.

M.P.