Is 71 mortus de sa sindrome de Cuirra. Sa denúntzia de su Comitau “Gettiamo le basi”

Ascurta custa nova



(S’úrtima nova) – Casteddu, 7 de su mesi de fiàrgiu - Funt assumancu 30 is militaris chi ant traballau in su Poligonu de Cuirra mortus po mori de mlàdias acapiadas a su serbítziu fatu. Est cantu denuntziat cun d-una nota su Comitau "Gettiamo le basi". Po su Comitau ghiau de Mariella Cao su mortu númeru trinta, est unu militari pugliesu chi s'at lassau una cida fait po mori de unu tumori, e chi iat traballau in su Poligonu de su 1966 a su 1972. Ma is militaris, si scit, no funt is ùnicus a nci passai: a cantu narant is tzifras de su Comitau funt assumancu 41 is tzivilis fertus de sa sindrome de Cuirra. Su Comitau sighit a lotai contra a s'ocupatzioni militari de sa Sardigna."Sa destrossa e su disacatu ambientali fatus de su Poligonu de Cuirra - pretzisat su Comitau in d-una nota - no podint essi prus cuaus". E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda