Tumore de sa mamidda, su mese de sa preventzione in sa Asl nugoresa

«Sa prioridade ses tue», narant sos de s’Asl nugoresa n.3 faeddende de sa campagna de preventzione de su tumore a sa mamidda, sa prus neoplasia frecuente in sas fèminas. E lu narant ammentende chi su de santugaine est su mese dedicadu a sas sensibilizatzione. Ma est totu s’annu chi su percursu de monitoràgiu gratùitu, pro sas chi nche sunt intre sos 50 e sos 69 annos, est ativu in sa Asl. «Totu sas chi ant retzidu sa lìtera de invitu dae su Tzentru Screening ant a pòdere fàghere sa mammografia a s’indonu sena retzeta de su mèigu suo», leghimus in sa nota de imprenta. Ma chie si siat – semper in intro de cussa fàscia de edade – podet pigare parte a su programma finas sena àere retzidu sa lìtera. Est bastante a cramare a su nùmeru 800.20.80.84 dae su lunis a sa chenàbura dae sas 9.30 a sas 11.30 e su martis finas dae sas 15 a sas 17.