Sas dunas de Capu Cuminu in sas passigiadas de su Ceas de Santa Luchia

Su Tzentru de educatzione ambientale e a sa sustenibilidade de Santa Luchia de Thiniscole at organizadu unu calendàriu atonginu ricu de passigiadas in sa natura pro connòschere s’ecosistema de sas dunas de Capu Cuminu chi nche sunt in intro de sa Zona ispetziale de cunservatzione de Bèrchida-Bidderosa e de sa Riserva de Biosfera Tepilora Rio Posada e Montalbo. Su primu apuntamentu est pro domìniga su 6 de custu mese in sos tretos de S’Ena ‘e s’achita. «Cando chi semus passigende amus a pòdere abbaidare e medire paris sos puntos de fortza e de debilesa de su sistema dunale», ant naradu sas operadoras de su Ceas Manuela Mulargia e Maria Luisa Mason. Sas àteras essidas sunt su 19 de custu mese e su 2, su 15 e su 22 de santandria.