Ecosostema urbano 2024, lugores e iscurigores dae sas tzitades sardas

Lugores e iscurigores in sos datos Legambiente in contu de prestatziones ambientales de sas tzitades sardas. Dae su raportu “Ecosistema urbano 2024” essit a campu chi Casteddu perdet oto positziones cunforma a s’annu coladu, cando fiat in sa de 16 totu s’istadu italianu (de 106 cabos de logu provintziales). Mirende a totu sas tzitades sardas esaminadas bidimus datos bonos, comente sa prima positzione de Tàtari pro sa cuntzentratzione mèdia annuale de Pm2,5 (prùeres fines), sa de tres de Casteddu pro su chi pertocat s’oferta de trasportu pùblicu, s’80% de diferentziada coladu in tres tzentros. Ma b’at prus de una crititzidade. In totue nche colat su 50% su livellu de sas pèrdidas de s’abba gasi comente mancat una rete de monitoràgiu regionale de sa calidade de s’ària.