Sas impresas artesanas creschent de pagu. Confartigianato: «Sa lege 949 siat istruturale»

Serrat in positivu ma cun dificultades su segundu trimestre 2024 de sas impresas artesanas de Sardigna. Cunforma a un’istùdiu de Confartigianato registramus in s’ìsula unu saldu de sete atividades carculadas sas 577 aberturas noas e sas 570 serradas. S’annu coladu su saldu positivu fiat meda prus mannu: 171. Confartigianto mentovat sa lege 949 chi in s’ùrtimu bandu at postu a disponimentu 22milliones e 400mìgia èuros. Dae s’assòtziu narant chi «sas aziendas artesanas sunt entidades fràgiles; pro custu pedint garantzias, seguresas e nudda burocratzia pro sa lege Artigiana. B’at bisòngiu de la pònnere in seguresa pro chi siat istruturale e torret a èssere de agiudu lestru che a su tempus coladu».