Ormègios in Capo Caccia, sos assòtzios ambientalistas otenent una pròroga pro sas osservatziones
Su 5 de cabudanni sos assòtzios Italia Nostra, Lipu, SardegnAmbiente, Punta Giglio Libera-Ridiamo Vita al Parco, Earth Gardeners, Parco NordOvest Sardegna e Sardenya i Llibertat, aiant presentadu a s’assessoradu regionale pro sa Defensa de s’Ambiente una rechesta de suspensione de su protzedimentu de Valutatzione de intzidèntzia ambientale (VincA) aviadu pro su progetu de “realizzazione di Campi Ormeggio nell’Area Marina Protetta di Capo Caccia - Isola Piana”. Totu naschiat dae sa documentatzione publicada e chi non fiat integrale cunforma a su che previdet sa normativa in vigore. Intre sos allegados nant chi bi fiat petzi s’istùdiu de VincA, una cosa ritènnida non bastante pro una valutatzione de impatu ambientale e pro sas osservatziones de sos tzitadinos. Gosu mannu, dae parte de sos assòtzios mentovados: in prus de pòdere àere, como, sa documentatzione mancante, ant otènnidu fintzas una pròroga de trinta dies pro presentare sas osservatziones. Su progetu, in s’Area Marina Proteta de Capo Caccia - Isola Piana, previdet ormègios pro navios mannos (yacht) dae 40 metro in susu (fintzas prus de 100) pro 216 puntos.