Fer e àreas idòneas, Lai: «Lege Pratobello istrumentu pro sos interessos de sa dereta»

Giulia Lai, ex segretària de Lìberu e avocada che a Michele Zuddas (mentovadu in s’àteru artìculu e cumpàngiu professionale suo in unas cantas cuntierras che a sa de sos pastores), movet dae duos elementos pro chistionare de sas prospetivas de sa batalla contra a s’ispeculatzione: sa bìsita a Sardigna de su segretàriu de Forza Italia Antonio Tajani («chi cun totu s’evidèntzia at fatu un’acordu cun Zuncheddu»); s’annùntziu de sos cussigeris regionales de minoria chi eris, in cara de sos comitados chi sustenent sa Pratobello 24 e de su coordinamentu de sos comitados contra a s’ispeculatzione, ant decraradu chi «mèrcuris ant a presentare sa lege ex art.102». Pròpiu mèrcuris b’est fintzas sa manifestatzione a sustegnu de sas firmas regortas. A bisu de Lai no l’ant a aprovare pro intreu sa lege, lege chi issa matessi cunsìderat «in parte dannosa» e a livellu giurìdicu «prus chi non dèbile» lassende·nche a banda su bonu de sa «mobilitatzione ingendrada». Ma mancari no aprovende·la b’at a àere unu vantàgiu pro sa dereta movende dae sa punna de su «mix energèticu» (comente afirmadu dae su cussigeri Tunis). Custa sa serrada de Lai, narende chi sa sua est «unu parre suo intre sos medas»: «Si sa Giunta no acollit sas propostas nostras ma peorat su Ddl suo acuntentende sa dereta, cheret chi sigat sa cuntierra in pratza giughende·nche·la a livellu istatale».