Progetu “Istèrridas”, dae su 10 de trìulas su càntigu a tenore torra “In Tzilleri”

Iscanu, Golothene, Lodine, Urtei, Monti e Lòcula. Custas sunt sas ses biddas interessadas dae sa sèrie noa de “In Tzilleri, vecchi e nuovi contesti del Canto a Tenore” chi comintzat mèrcuris su 10 de trìulas.

"In Tzilleri" est una de sas fainas programmadas in intro de “Istèrridas: Ricerca, salvaguardia e diffusione della pratica del canto a Tenore” (progetu de s’Istitutu Superiore Regionale Etnogràficu finantziadu cun fundos ministeriales de sa L. 77/2006) chi ocannu ponet in parte sos tzilleris de sas comunidades mentovadas a pustis de una prima editzione de su 2022 isparghinada in sos de Patada, Padru, Oroteddi e Durgali.

Tzilleris, est a nàrrere sos locales chi in sas comunidades nostras galu oe sunt unu puntu de addòbiu, de aunimentu e de iscàmbiu de grandu importu e chi, in su tempus, sos cantores ant impreadu comente su mègius logu de annestru.

«S’idea nostra - narat Bustianu Pilosu, coordinadore de sa Rete de su càntigu a Tenore – est sa de recuperare nessi in parte custos logos, mancari in ocasiones ispetziales, in collaboratzione cun sos tzillerajos e sas amministratziones. De custa manera custos ses addòbios propostos dae su progetu “Istèrridas” si presentant comente unu modellu, un’esempru de giudu pro totu sas comunidades, in maneras ispontànea e fintzas organizada».

Custos addòbios – totu cantos sena amplificatzione - ant a èssere registrados e filmados sena chi nemos nàrgiat a àtere ite cheret fatu e comente: una documentatzione reale de cuntestu, diferente de su totu dae sa chi, pro nàrrere, si faghet in sas fases de chirca in logos costoidos e amparados. Cantende peri sos tzilleris, mancari in addòbios calendarizados, s’ispontaneidade est mere, nos leat a manu tenta, si faghet logu e lìberat su càntigu.

Su primu apuntamentu, unu pagu deroghende sa règula ma cunfirmende·la e unu pagu pro rispetare su connotu montiferrinu, no est peri sos tzilleris ma in sos “comasinos” de Iscanu (su comasinu de sas Bàtoro Colonnas, su de Frore e su de Piu). Data fissada su 10 de trìulas, mèrcuris, dae sas 20 a sas 22.30, cun su “Cuncordu Sas Bàtoro Colonnas” chi faghet sos onores de domo e àteros duos grupos de càntigu de àteras biddas: su “Santu Laretu” de Silanos e su “Pòpulu sardu” de Ulìana.

Dae su Montiferru a su Màrghine, s’incras sa tapa est in Golothene (a sa matessi ora) in sos tzilleris “La Terrazza”, “Sa Ziminera”, “Su Monumentu” e “L’Aurora” cun duos cuncordos locales (“Santu Bachis” e “Tottoi Zobbe”) e cun sos òspites “Su Hussertu de Mamujada” e su cuncordu “Sos Bator Moros” de Fonne. “In Tzilleri” sighit su 17 in Lodine, su 18 in Urtei, su 23 in Monti e su 26 in Lòcula.

«Apuntamentos periòdicos intre cantores e apassionados – agiunghet Diego Pani, responsàbile tècnicu iscientìficu de su progetu – pro istare paris e pro li torrare a su càntigu a tenore cussa funtzione sua de aunimentu sotziale, de addòbiu intre sas generatziones abertu a totu cantos, pro si manifestare e pro dare a sas levas noas sa possibilidade de imparare “sa moda” de sa bidda dae sa boghe bia de sos prus mannos e non dae sos discos o dae YouTube ebbia».

“Istèrridas” sighit su surcu sestadu dae “Modas”, progetu finantziadu dae su MIBAC cun su bandu 2018 de sa Lege N°77 a tutela de su patrimòniu immateriale Unesco, eredende·nde s’atentzione pro sa diversidade culturale e musicale e s’inclusione de custa in unu percursu de chirca globale movende dae acostiamentos diferentes: dae s’acadèmicu e de istùdiu a su chi pertocat s’ispàinu pùblicu de sos resurtados e a sa promotzione regionale, natzionale e internatzionale de su bene. In primu pianu, comente semper, sos cantores, sas fainas issoro e su contivìgiu de s’arte pròpia, ogetu de chircas, momentos performativos, laboratòrios peri sas iscolas, publicatziones e discos.

foto tirada in Durgali