Tyrrhenian Link, sa Corona de Logu contra a sos espròpios fortzados in Ceraxius

«Indignatzione». Est cun custu sentidu chi sa Corona de Logu, assemblea de sos amministradores e de sas amministradoras indipendentistas, est manifestende s’arrennegu suo «pro sas modalidades fortzadas de espròpiu de sa terra nostra aplicadas in sas oras coladas in sos sartos de Ceraxius in intro de su progetu Tyrrhenian Link».

Progetu chi, nos ammentant sos de sa Corona, punnat a istèrrere unu collegamentu in suta de mare pro s’esportatzione de energia rinnovàbile dae Sardigna a sa Sitzìlia e a sa penìsula. «Unu programma – narant – in ue sa Sardigna est una colònia sighende sa traditzione pluriseculare de sutammissione polìtica, culturale e econòmica». Custos sos àteros agetivos impreados. «Traviadore», pro su mudìmene «guvardu» de sa polìtica autonomista; «astragadore», imbetzes, s’impreu de sa fortza pùblica. «Lu torramus a nàrrere – narant sos amministradores indipendentistas espressende solidariedade a su massaju Metteo Peddizzi e a sa comunidade ceraxina -, sa terra sarda est de su pòpulu sardu e de sos traballadores».

m.p.