Reconnoschimentu vocale e limbas minorizadas, est prontu Common Voice in sardu

A pustis de sa presentada de su navigadore Firefox, sighit sa collaboratzione intre Sardware, grupu de ativistas pro sa tecnologia in limba sarda, e Mozilla, s’azienda californiana nòdida chi traballat pro una mègius rete, prus aberta e democràtica. Sa nova de custas dies pertocat sa versione sarda de Common Voice, initziativa presentada cun sa punna de fatzilitare s’isvilupu de tecnologias de reconnoschimentu vocale pro totu sas limbas, e duncas fintzas sas chi a su presente sunt minorizadas. S’aina est pronta pro s’impreu e pro mèdiu de custu impreu est chi at a dare sos resurtos suos. Difatis, pro chi sos motores istatìsticos siant annestrados, bi cherent oras e oras de registratziones chi sos utentes podent lassare in cue, in archìviu, seberende s’optzione “chistiona”. Àteru sèberu est de “ascurta” pro chi s’utente potzat validare su chi at intesu.

“Podet èssere fintzas unu giogu ispassiosu pro imparare a sa pitzocalla”, narat Maurizio Piroddi, membru de Sardware e babbu de duos pipios. “Sa filosofia de Mozilla est pròpiu a s’imbesse de sa de is aziendas tecnològicas mannas”, narat Gianfranca Orunesu, membru de Sardware: “difatis, is sistemas atuales de reconnoschimentu de boghe funtzionant isceti pro is lìnguas egemònicas, ma fintzas cussos sunt istados creados faghende un’impreu problemàticu de is datos de is utentes.”

Bona est sa resèssida de Common Voice in àteros logos ue est forte sa batalla linguìstica, comente in Catalugna. Common Voice podet èssere impreadu lompende·nche a inoghe.