Sèrie C, lu derby sardhu a li sassarési

Tre so li gol. E tre so li punti chi la Torres à marchaddu i’ lu so’ taccuinu cu’ l’Olbia isciddu di sottu in casa sóia in chistha gara. Chi éra la di tre di un campionaddu ischumenzaddu avveru cu’ la màrcia giustha pa’ li sassarési. Lu derby sardhu di chisthu gironi B è dunca archibiaddu cu’ un càmbiu di crassìfiga e abà cun dui isqhuadri sori a lu cumandu: la Torres e la Carrarese, tutt’e dui a quota nóbi. L’Olbia, chi rimani a séi, è abà suippassaddu da lu Pescara e da la Lucchese. A occi di zircha tremíria passoni (pressappoggu milli li tifósi torresini aggiumpiddi a lu Bruno Nespoli) la parthidda s’è prisintadda cumenti un domìniu cumpretu di li giuggadori di Alfonso Greco. A la fini di lu primmu tempu accó lu gol di lu vantàggiu turritanu: lu capitanu Gigi Scotto no si l’à ibbagliadda la pussibbiriddai, palloni sottu la trabéssa e 0-1. Scotto – duppietta - à marchaddu puru lu sigundu da li òndizi metri a lu di 69 (Ruocco sthrampaddu in àrea e rigori frusciaddu da l’àibitru Nicolini). Paddroni di casa zóppi zóppi. La Torres è un’althra cubba. A dézi minuti da lu trìpizi frùsciu finari v’à pinsaddu Liviero: 0-3.