“Pizza Bit e Pastry Bit Competition”: duos sardos in finale

Aprofundimentu de su lunis - B'est finas sa Sardigna in sos duos concursos de importu mannu chi s'Italia dedicat a su setore pitzeria e de s'ofelleria màstrina. Faeddamus de sos cuncursos organizados dae "Molino Dallagiovanna”: su "Pizza Bit Competition" e su "Pastry Bit Competition". In custos cuncursos sunt duos sos sardos lòmpidos in finale.

S'addòbiu finale est pro sàbadu 9 de su mese de cabudanni in sa domo de s'azienda de Gragnano Trebbiense, in provìntzia de Piacenza, in ue, in ocasione de sa "Festa dei Granai", sos noe finalistas de su "Pizza Bit Competition" e sos noe finalistas de su "Pastry Bit Competition" s'ant a disafiare cun pitzas e panetones màstrinos. L'ant a fàghere pro decretare sos "Ambassador" noos de s'azienda "Molino Dallagiovanna", "leader" in Itàlia pro su cumpartimentu de sa podda.

Ma chie sunt sos sardos chi ant a leare parte a sa finale de su "Pizza Bit Competition" e de su "Pastry Bit Competition"? Sos nùmenes chi ant a rapresentare sa Sardigna sunt su de Simone Pilloni e su de Gabriele Giambastiani. Simone Pilloni traballat in su ristorante-pitzeria- ofelleria " Tziu Mauriliu la bottega del cibo" de Uras, in provìntzia de Aristanis , e est su finalista de su "Pizza Bit Competition". Mentras, a rapresentare s'ìsula in su setore ofelleria, est a nàrrere in su "Pastry Bit Competitionest", est Gabriele Giambastiani de su "T Hotel" de Casteddu.

Duncas, sunt noe sos finalistas in gara in ambos sos setores. In su de s'ofelleria s'ùrtimu avaloramentu finale at a atènnere sa calidade de su rei de sos durches fatos cun sa màdrighe: su panetone, mentras in su setore de sa pitza sa gara s'at a isboligare pro decretare sa pitza Margherita mègius.

A valutare sos concurrentes de sas garas ant a èssere duas giurias de espertos de su setore, "blogger" e giornalistas.

Sas duas finales ant a àere comente presentadores Andrea Mainardi e a Daniele Persegani, "chefs" e presentadores televisivos famados meda.