Migrantes, su guvernu Meloni pedit agiudu a sas Ong

Aprofundimentu de su mèrcuris - S’istiu faghet sa parte sua. Sa crisi in Tunisia su restu.

Su resurtu est chi sos chi movent dae sa costera meridionale de su Mediterràneu sunt gasi artos chi est dae su 2016 chi non nde bidìamus. Connoschimus finamentas cale est sa lìnia de su guvernu Meloni, est a nàrrere contrària a sas Ong e a sos interventos issoro.

In custas chidas semus bidende chi carchi nae de sas Ong diat pòdere èssere de agiudu. Agiudu pedidu pròpiu dae su Tzentru natzionale de coordinamentu pro su sucursu marìtimu (Mrcc, in inglesu). Unu de custas primas acontèssidas la marcamus in calendàriu a su 6 de trìulas, cando sa nae Astral de sa Ong Open Arms fiat sucurrende duas imbarcatziones in sa zona Sar (search and rescue, in inglesu) maltesa. Sende chi b’aiat àteras ses imbarcatziones in perìgulu a pagu tretu, su Mrcc italianu aiat pedidu agiudu pro sarvare in totu 175 persones (70 sos pitzinnos). Su 14 su sutasegretàriu de s’Internu Nicola Molteni (intervistadu dae Il Foglio) aiat naradu chi sa cosa fiat un’etzetzione. Ma a s’in cras de cussos faeddos su Mrcc italianu aiat pedidu a sa Geo Barents, nae de Mèigos Sena Fronteras, de sucùrrere 11 imbarcatziones, semper in zona Sar maltesa (sarvende prus de 420 persones). E gasi sighende·bi·la fintzas cun àteras ong (sa Sea Watch) e fintzas a custas dies. E in die de mesaustu su ministru de s’Internu Matteo Piantedosi, intervistadu dae su Messaggero, at naradu chi «su chi b’at capitende est sa proa chi mai amus àpidu pregiudìtzios» contra a sas Ong (in antis fiant “taxi de mare”, un’acusa prus chi no unu pregiudìtziu). In su matessi tempus su ministru at naradu, pro marcare s’impossibilidade de una suplèntzia de sas Ong (e bi diat mancare àteru, bella diat èssere) chi Guàrdia costera e Guàrdia de finàntzia ant sarvadu 72mìgia e 46 cristianos. Sas Ong 4mìgia e 113. Gente chi podiat mòrrere. E chi no est morta gràtzias a sas Ong.