"Gambero Rosso": su mègius "street food" de Sardigna

Aprofundimentu de su chenàbura - Cale est su mègius "street food" de Sardigna? A si lu nàrrere, in s'editzione 2023 de sa "Guida Street Food", est su "Gambero Rosso", chi presentat una mapa cun prus de 470 indiritzos cun unu "plus" de aprofundimentos, retzetas illustradas e un'apenditze noa dedicada a sos "food truck".

Sa de su 2023 est una ghia chi si contat una Sardigna in ue su "street food" est una realidade interessante meda e at finas insignas noas de iscobèrrere. Tra sas novidades, in Casteddu agatamus sa "taqueria" messicana "Taquito". "Taquito" s'agatat in carrera Azuni. Sa "taqueria" est indicada in Sardigna comente 'campione', est a nàrrere ca at otentu su puntègiu prus artu dae sos crìticos.

Ma ite nos proponet "Taquito"? Sa "taqueria” de sos coghineris Luca Bertocchi e Federico Peis nos proponet feti pratos de sa traditzione messicana. Difatis tocat peri a sutalineare ca sos de "Taquito" isseberant feti matèrias primàrgias pro sas retzetas issoro.

Semper in Casteddu agatamus un'àteru "street food" de primore. A si lu presentare est su ristorante de carrera Mameli "La Mallica". Famadu pro sos "gnocchi fritti" e pro sas "tigelle" chi si podent acumpangiare cun salumes vàrios.

Abarrende in carrera Mameli su "street food" licantzu lu proponet "Porta 1918" puru, cun sa pitza in làmia fata cun sa màdrighe. Tra sas propostas b'at sa pitza culurgiones, sa purpu e patata, sa càule de frore e àteras medas.

No est totu, b'at unu "street food" de calidade finas in Carluforti, in sa "pizzeria Da Gisa".

In Tàtari, imbetzes, non si podimus pèrdere sa fainé nuscosa e bona a beru de Sassu. Semper in sa primu tzitade de su cabu de susu su "Gambero Rosso" nos cussìgiat sa salumeria istòrica de "Mangatia", chi s'agatat in carrera Università, e su ristorante salumeria e butega "Sale&Pepe" in carrera Maurizio Zanfarino.

In s'Alighera sa ghia indicat "Milese", famadu pro sas fogatzas sardas. Semper in s'Alighera, sa "Prosciutteria Santa Miquel" proponet unu "street food" primorosu cun sas "tapas" suas.

In Nùgoro tocat a tastare su paninu cun fetina de bitellu fatu de sa rostitzeria "Fratelli Lai". Bonos finas sos paninos e sa "pinsa" de su ristorante "Cibum" de Aristanis.