Sos giornales de oe #058

Chi siamus in intro de s’istajone istiale est craru e non pro su mèteu ebbia. Est ca sos giornales nos contant de turismu e de cussa economia. Giai eris faeddaiant de una crisi de su setore, cun pagas presèntzias e cun una tendèntzia chi non diat dèvere mudare meda sas chidas imbenientes.

Duncas, si eris podìamus lèghere, in sa prima de La Nuova Sardegna, su lamentu de Federalberghi, pranghende una mèngua de su 20%, oe bi pensat s’assessore regionale Gianni Chessa a faeddare de «istajone record cun lòmpida a sos aeroportos chi mai si fiat bida». A bisu de s’assessore sos turistas bi sunt «ma a sos hotel, tropu caros e betzos, preferint sos b&b e sas segundas domos. Su turismu est mudende pedde ma sas istruturas ritzetivas sunt unu passu a dae in segus».

Parèntesi, finas La Stampa oe aberit narende: «Aèreos, prajas e ristorantes, s’istiu prus caru». Forsis chi su problema est prus generale e chi nche bàrigat su chi narant Chessa e albergadores.

Torrende a nois, tzertu in sos aeroportos no est totu a postu. Fintzas custu lu leghimus in su giornale tataresu, ma est L’Unione sarda chi cun custu tema aberit s’editzione sua: «Sa continuidade territoriale est in tilt, sa Regione est traballende pro unu modellu nou cun prus bolos e unu lìmite a sas tarifas: cras in Roma su primu addòbiu in sa de su ministeru de sos Trasportos». E, de prus, torrende a una chistione de carchi chida a como, «pagu tempus b’abarrat pro impugnare sa delìbera de fusione».

E mancu male in sos mares sardos non b’at iscualos! Cussos sunt in su Mare Ruju in ue «unu turista, mischinu, est mortu pro more de un’assàchiu», leghimus in sa rubrica Caffè scorretto de L’Unione matessi. Cheret chi lu legamus intreu cussu “fundu”. «Venghende·si, a cussa bèstia l’ant tenta e morta a pùngios e corfos de fuste. Gasi imparat». Dae su Mare Ruju a tretos caraìbicos, in ue b’at àpidu allarme pro unu pischecane. «S’imprenta cubana at reagidu cun un’artìculu chi nde pigamus carchi passàgiu: “Cheret chi non timemus sos iscualos. Cheret imbetzes chi rispetemus sa presèntzia e s’autoridade issoro”». S’artìculu cubanu mentovadu in l’Unione sighit faeddende de «s’impignu pro sa cunservatzione de sos otzèanos, s’amire pro sos iscualos, pro Cuba e pro sa pisca». E gasi serrende: «S’otzèanu est domo issoro e sa presèntzia issoro est singiale de salude e de echilìbriu de sa vida marina. Non semus in gherra contra a sos iscualos». Ite narant in s’Unione pro cussu artìculu cubanu? «Una letzione de ecologia, cultura e giornalismu».

Ma abarrende in tema de pùngios cheret chi faeddemus finamentas de sos chi ant iscutu a su giornalista sardu Antonello Lai de Tcs in ocasione de unu cuntzertu in unu locale de Casteddu. Est cosa chi podimus lèghere in s’Unione, gasi comente podimus lèghere de sa giornalista russa Elena Milashina de sa Novaya Gazeta assachiada in Tzetzènia, ferta a sos pòddighes, tusa in conca e tinta a birde in cara.

Peristantu sa Lega, comente leghimus in sos giornales italianos, cheret a Le Pen in intro de un’alleàtzia europea gasi comente Berlusconi isdoganeit s’Msi. A cras