Sos giornales de oe #048

Si diant pòdere lèghere sos giornales de oe movende dae sa chistione sanitària chi est animende s’allega polìtica regionale. Deretu podimus nàrrere chi su disinnu de fraigare bator ospidales noos in Sardigna nudda b’intrat cun su chi amus semper intesu e naradu punnende a una mègius sotziedade sarda, est a nàrrere “+ospedali – militari”. Ca si mancant sos mèigos sos militares abarrant (e su generale Figliuolo li torrat gràtzias a sa Giunta regionale).

De unu de custos bator ospidales nd’amus finamentas faeddadu leghende sos giornales de su 7: «Un’acòrdiu chi non faeddat de istàdiu ebbia ma fintzas de un’ospidale, de unu polu nou de ufìtzios, de unu campus universitàriu de acumprire e de àteras istruturas pro potentziare sos servìtzios universitàrios. “Sa Regione – mentovende su progressista Francesco Agus – at vinculadu su Comune a sutascrìere un’acòrdiu in ue b’at de totu, fintzas un’ospidale chi nemos ischit in ue l’ant a fàghere”».

Como paret chi de istàdiu non si nde faeddet prus e duncas su slogan diat pòdere èssere “+ospedali – stadi”. Cosa chi, movende dae sas prioridades, non diat èssere mala, in astratu. Como, a banda su chi b’at a acontèssere cun su sìndigu Truzzu chi est semper pedende su dinare regionale pro s’istàdiu nou, est a bìdere cantu at a bàlere cussu “+ ospedali”.

Ambos giornales, l’Unione e la Nuova, nos contant sa noa de custas bator istruturas noas: una in Tàtari (su Santissima Annunziata 2), una in s’Alighera (ghetende a pare su Tzivile e su Marinu), una in su Sulcis (in càmbiu de su Sirai de Carbònia e de su Santa Barbara de Igrèsias) e una in Casteddu (cando chi como bi sunt su Businco e su Brotzu). Lassemus·nche a banda Nord-Ovest (in s’Alighera diat pàrrere chi b’apat gosu bipartisan) e su Sud-Ovest; abarremus·nos·nche in Casteddu. L’Unione narat chi giai sunt potentziende su Brotzu e chi sa delìbera de su primu de làmpadas cun sos bator noos «iscontzat totu».

Legimus in s’Unione chi sa "piastra tecnologica" de su Brotzu – in foto finamentas su progetu cun chimbe pianos de artària – est cosa andende. Mentovadu su finantziamentu de «25 milliones de fundos europeos», su de «40 milliones de fundos regionales (de su 2017, Giunta Pigliaru)» e finas su «primu apaltu de 5 milliones» agiudicadu a concruos de s’annu coladu. Totu pro b’àere «Dea e Trauma Center, 2 salas operatòrias ìbridas (Neurochirurgia e Chirurgia vasculare) e 12 salas operatòrias, terapia intensiva post-chirùrgica cun 24 letos». Collegadu a sa piastra pro mèdiu de tunnel finas su tzentru de terapia iperbàrica. Duos pianos de interventu in contradditzione, duncas.

Su chi leghimus in sa Nuova est custu: «Baddu cales terrinos ant a seberare». E posca. «Ite b’amus a àere a pustis no est cosa chi agatamus iscrita in sa delìbera aprovada duas chidas a como dae sa Giunta Solinas. In cue no ant mancu ipotizadu dae cala cassa pùblica diat dèvere lòmpere su milliardu – istima menguada – pro los fraigare totu cantos».

S’at a pèrdere su chi si fiat megiorende? E cantu b’at a chèrrere pro su chi ant in pessu deliberadu? In su mentres sa pellìcula est sa matessi: eris in casteddu protesta de su sindacadu Usb ammentende·nos chi sos tumores in fèrias non b’andant.