"Riprendiamoci il Comune", duas propostas de lege de initziativa populare

Pro mèdiu de duas propostas de lege de initziativa populare, su comitadu “Riprendiamoci il Comune” est aprontende sa campagna omònima punnende a unu modellu ecològicu, sotziale e relatzionale nou movende dae sas democratzias de prossimidade, est a nàrrere dae sos Comunes etotu.

Sa prima proposta mirat a una riforma de sa finàntzia locale pro mèdiu de unu “parègiu de bilàntziu sotziale, ecològicu e de gènere” eliminende sas normas chi oe impedint de assùmere personale, dende a sas comunidades sos istrumentos de autoguvernu partetzipativu, amparende territòriu, patrimòniu e benes comunes e re-internalizende sos servìtzios pùblicos.

Cun sa segunda s’obietivu est sa sotzializatzione de sa Cassa Depositi e Prestiti pro chi devèngiat un’ente de diritu pùblicu detzentradu e a disponimentu de sos Comunes.

A bisu de sos promotores, custas duas propostas sunt cumplementares «ca no est sa resilièntzia a mudare su mundu».