"Ainas e fainas", unu cursu de sardu movende dae s'economia de sos logos

Su Comune de Fonne, cabu-filera de su progetu “A in antis in sardu”, e s’assòtziu Suia sunt proponende unu cursu de limba sarda aplicadu a sas esigèntzias de sos chi traballant in sas biddas e de sas aziendas issoro. Su cursu est indiritzadu a titulares e clientes de butegas, potecarias, tzilleris, frailes, furros, posadas, ofellerias, recreos, sabaterias, ofitzinas, draperias, casaras e àteras aziendas de produtzione e de servìtzios. «Si est beru - narant sos organizadores - chi su traballu e sos servìtzios mantenent bias sas comunidades nostras, beru est finamentas chi su cuntestu sòtziu-econòmicu est una de sas mègius carreras pro una limba che a su sardu, dae tempus in caminu conca a sa normalizatzione sua». Su cursu, deghe addòbios in lìnia pro permìtere sa presèntzia de traballadores de àteras biddas, at a èssere partzidu in duas partes: sa prima chi pertocat sas règulas de iscritura in sardu; sa segunda in intro de sa comunicatzione esterna aziendale pro bèndere in sardu produtos e servìtzios e pro retzire in sardu sos clientes. Su cursu at a comintzare a concruos de làmpadas. Inoghe su mòdulu (https://forms.gle/hCaXo8iDnP2xFqQ76) pro sas iscritziones chi iscadint su 25 de làmpadas. Sas comunicatziones ant a èssere dadas manu manu in su grupu facebook "Ainas e Fainas - Su sardu in s'economia de sas biddas" (https://www.facebook.com/groups/1939507593115694)